deddie

Herschelle Benjamin

vir Hermanus Johannes Benjamin 

 

Deddie, 

hie’se gedig vir jou oek 

want mammie staan klaar geyk in ou ink 

van ou gedigte 

en jammer 

ek skryf vir jou oor jou van jou 

jammer 

deesdae is my pen rigtingloos 

tussen die tirades van menswees in soe ’n 

wêreld 

en jonkwees met soe ’n 

hart 

 

Deddie, 

ek maak soggens my koffie soes joune 

te veel melk te min suiker 

ek lag nie meer daai klapperlag soos jy nie 

ek loop kopaf en bekstil 

my kamer is onnet en skoene vuil 

veters wil nie knoop nie 

en my 

kop (is dalk) inplek met my hart in chaos 

 

Deddie, 

hiesie mooiste rose in my tuin 

en Leeukop is gigantisch deur my venster 

my tong probeer Nederlands en Vlaams 

maar nét as ek dink ek kan, 

onthou ek Deddie se Afrikaans …

 

Waarheen het die tyd gegaan? 

toe ek op jou skouers en agter jou rug ’n kroon was 

toe ek jaloers kyk hoe jou hande ’n graaf 

vat 

toe ek in osse ou Ford jou vernuf en

kar-romanse bejeën 

toe ek jou glimlag sien tussen skare want 

dis

‘my klong op daai verhoog’ 

toe jy my afsien innie verte na oorsese lande 

wat net bestaan op julle tv-wêreld 

 

Deddie, 

jammer, want ek sukkel soms baie 

ek is al nerfaf geval en my tande breek soos 

skree geluide uitbars 

my hart is voortdurend op soek na ’n ander liefverslaafde 

en my pen, 

voel vreemd, lig, bedwelmend en gewond 

 

Deddie, 

ek wou jou eerder met houtskool skets en teen my muur plak 

maar hier oppie vloer skryf ek ’n lang gedig 

met jou erfpen 

en hoor jou stem innie verte: 

‘Skryf daaroor my kind. Skryf.’

 

© 2019. Die outeur.

Om die pdf-weergawe van hierdie stilus stuk af te laai, klik gerus hier.